"Good Day Judge Limit and ManCourters. Me tiad a di same ol BS everyday wid da man yah wey me dey wid. Everyday is something new and something else. Me no know if unu remember di 1st case me did sen it in. Di one wey him tell lie bout him inna accident an when me walk go look wey him claim say di accident happen not accident nutten an all me a call him, him nah ansa den him come home bout him an cousin did a reason. Anyways, Monday nite me an him a fold up some clothes an ting. Him get inna dis heat bout phone lock off an him neva notice ray ray ray. Me neva did a tek notice but den di house phone ring an is fi him call so when me go fi gi him di house phone me see him downstairs pon him cell a try talk inna him throat. Me jus in time fi hear him a tell di person bout we son an him school an how di school work etc. Me neva too penny it – me jus see di phone here. Me gwan linga linga downstairs now an hear him start talk bout me now like di person a ask how we get we son inna da school dey u know – so right away me figure is somebody wey know bout me an him den right? Cuz dem a ask bout me an me son.
Me wid my nuff self hear a woman vice an ask him a who dat – him say a somebody a ask him summen. So me ask if a somebody wey me know an him blaze up long time say XXX him fren baby madda an tru she a plan fi move she wan know bout di school me say alright den so wha di secret fah den. Plus wha day me did a look fi a number fi XXX too cuz she have some dvd fi me wey me lend har. Dis morning now (Wednesday), me it neva sit well wid me so me ask him fi gimme XXX number mek me call har bout di dvd. Him a scroll roun an a buck shuffle den gimme one numba. When me call it numba no exist – no not in service enug ‘NOT ASSIGNED’. So me say to him say no man wrong numba dis – an start help him look fi di number inna him phone from May 16 (me know say a after 9 inna di night so a dat time frame me a look inna) buck up pon a nex numba now an him say a it dat so me call it – gal say she no name XXX an have crazy attitude too enuh. But right away me pick up di vice. So me tell him say wrong number again an him start say a da # dey she call him pon an is fi har numba. So me call it back infront of him an di ask di gal if she know him, she say no. So me start say to him say wid di gal pon di phone a wrong numba dis man an start bawl out him name. Hear di gal pon speaker phone bout yes me know him an him wife like she tink she smart – me jus tell har say me no wan hear nutten from she cuz when she fi know him she neva him an hang up. Me jus walk off lef him. But me no know right now how fi approach it cuz me know it no done a rass. Me did wan call har back but me feel like say him dun call har aready when me leave."